|
Minun kieliki
- Tuntuu ette oon elämästä ja kuolemasta kysymys ko laulan lauluja Tornionlaaksosta. Löyvän minun äänen ja sielun. Ja ko laulan näitä lauluja tunnen ette kuulun yhtheen ihmisten kansa täälä. Tunnen kans ko mie laulan ette mieki olen kakskielinen, ette meänkieli oon minun kieliki.
- Meänkieli oon aina kiinostunnu minua, vaikka met emmä puhuhneet sitä kotona. Mutta minun vanhiimat puhuit kieltä keskenänsä ette mie olen aina kuulu kieltä ja ymmärän kohta kaikki. Mamma oon kertonu ette mie pikkusenna halusin oppia kieltä sen takia ette olisin pystyny puhuhmaan farmuurin kansa, joka tuli Suomesta. Yliastheela opiskelin suomea vähän aikaa ja tulevaisuessa halvaisin opiskella lissää. Tunnen välistä turhautuneeksi ko en ossaa puhua kieltä. Mutta laulaamalla näitä lauluja saatan voittaa takashiin kielen. Tuntuu hyvältä ette oon vahva itenttiteetti, antaa turvalisuutta ja mie rohki tunnen kunka tämä työ kulttuurin etheen vahvistaa minun ommaa itenttiteettiä.
Täyspäiväinen kulttuurityöntekijä
- Olen laulanu niin kauvon aikaa ko saatan muistaa. Muistan ette pruukasin seisoa peilin eessä ja miimata ko olin pikkunen. Mutta en olis koskhaan uskonu ette pystyn elättämhään itteä tällä mallin. Tunnen suuren ilon laulamisessa ja freistaan löytää oman tyylin. Häätyy hyväksyä ette ottaa aikaa löytää oman ilmaisun. Jord oon pohja minun työssä, mutta olen mieleläns muitten kansaki töissä jos tuntuu oikeaalta. Tansarin Jenny Abdelkaderin kansa olema esimerkiksi esittänheet näytelmän Om det står en ängel i din trädgård (Jos seisoo enkeli sinun puuttarhaassa) joka muun muassa käsittelee 3G-laajentamisen konsekvänsiä ja olen kansa myötä pohjoiskalottiyhtyessä Tre folk i norr (Kolme kansaa pohjoisessa). Siinä oon muusikoita myötä Ruottista, Norjasta ja Suomesta.
- Oon tärkeätä ette tohtii ottaa päätöksen olla täyspäiväinen kulttuurityöntekijä, ette uskoo ette sen pääle mennee ellää. Ette täälä oon muita kulttuurityöntekijöitäki merkittee paljon. Vaikka ei kohata niin ushein niin vain tieto ette toisiaki oon olemassa antaa tuntheen ette sitä oon myötä yhessä yhteyessä.
Uusi levy
Kolme vuotta sitten Jordin ensimäinen levy tuli ulos, Väylän virrassa, ja syksylä, lokakuussa tullee toinen, Mailmale.
- Olin niin ilonen ette met pystyimä tekheen yhen levyn ja ette tehhä vielä toisen tuntuu aivan mahtavalta. Niinku ensimäisessä levyssä niin tämäki sisältää sekä vanhaata ette uutta materiaalia, mutta tällä kertaa met laulama enämpi. Tuntuu hyvältä justhiins siksi ko laulu oon niin tyypilinen näile seutuile.
Jos halvaa olla esintymässä häätyy aina olla jotaki uutta plakkarissa, ette oli hyvä tehhä tämän levyn nyt. Tuntuu kans hyvältä ette tornionlaaksolaisia kansanlauluja levytethään, ette meän laulut oon koossa levyissä. Minun työn kans halvan myös jättää jälkiä aijassa, ja sen pystyn tekheen levyilä.
Ko levy oon valmis niin Jord lähtee kiertueelle, niin Etelä-Ruothiin ko Norrbottenhiin, Haaparanta, Jellivaara, Gävle, Sundsvall ja Tukholma oon muutama paikka jossa esintyvät.
- Tykkään kovasti olla kiertueella. Silloin voin parhaiten, ko saan seisoa lavala ja kohata yleisöä. Ette nyt rohki ootan ette pääsen lähtemhään liikkeele taas. Mutta ennen sitä niin olema Norrbottenin museolla neljä päivää, sielä esitämmä lauluja uuesta levystä ja sitten ateriavisunääri Björn Ylipää oon kans sielä. Hään tulkittee meän musiikkia ruala! Jännä!
Halvaks tietää lissää Jord-ryhmästä, vieraile www.fmg-jord.com
|
